Mamit District a Darlak leh Tuidam inkar kawng ah motor tlan dan thar siam

by Editor

Tualchhung News

ZORAM TODAY| 2nd July, 2024 (Tues): Mamit District chhung Darlak leh Tuidam inkar kawng (via Sabual lui/ kawng hlui) ah lirthei tlan dan tur vawiin khan Sorkarin a siam thar a, he thupek hi zawm theuh turin hriattirna a ti chhuak.

Vawiina Sorkar thuchhuah tarlan danin, Darlak leh Tuidam (via Sabual lui/ kawng hlui) hi fur khua a nih avangin a nal em em a, tin helai kawng hi a zim avangin lirthei inpelh kawngah harsatna a awm thin avangin lirthei veivak tan chetsual a hlauhawm a, chuvangin mihring nunna leh bungraw chhe tur ven nan helai kawnga lirthei tlan dan tur khuahkhirhna thar siam a tul hriat a nih avangin Lalthangpuii, MPS SP Mamit chuan Motor vehicle Act, 1988 (Act of 1988) Section 115 leh Mizoram Sawrkar Notification No. B.12021/10/ 2004 TRP Dt. 1.06.2006 in thuneihna a pek angin Darlak leh Tuidam inkar kawng (via Sabual lui/kawnghlui) lirthei MMV leh HMV te tlan dan tur ruahmanna thar siamin a hnuai a mi ang hian thupek chhuah a ni.

Lirthei tlan dan tur: Dar 05 : 00 Am - 02 : 00 Pm- Tuidam atangin chhuk zawnga tlan tur a ni ang. Dar 03:00 Pm - 4 : 00 Am- Darlak lam atangin chho zawnga tlan tur a ni ang.

He thupek hian Magistrate/ Police/Excise/Army/ Central Force/ Emergency Duty/VIP/ Special permit/ Two wheeler leh LMV te a huam lo ang.

Lirthei khaltute leh passengers te him tlanna tur a nih avangin lirthei LMV leh HMV khaltute'n thupek hi zawm theuh turin kan inngenin kan inhriattir a, thupek bawhchhia chu u/s 179 MV Act hmanga hrem an ni ang.

He thupek hian SP, Mamit District thupek lo chhuah tawh vide SP/MMT/RO/72/2023/1142 Dt. 5.10.2923 chu a thlak/luahlan ang, tiin thuchhuah siam a ni.